Stefana, Darija, Uroš i Anja su se rodili jutros na Cetinju u razmaku od dva sata. U cijeloj priči ne bi bilo ništa neobično da ovo četvero djece nisu rodile tri sestre, pišu vijesti.me

Istovremeno, u rodilištu cetinjske bolnice rodile su Olivera Mugoša Midžor, Jasna Rakočević i Jelena Vukčević.

“Sezonu” porođaja jutros je u 9 sati “otvorila” Olivera, koja je rodila Stefanu, nakon nje je Jasna rodila blizance Uroša i Anju, a u 11 je “serijal” zatvorila Jelena, kada je donijela na svijet malu Dariju.

Tako je Donjogoričanka Mara Mugoša doživjela neobičnu i rijetku sreću da u dva sata dobije čak četvero unučadi od sve tri svoje kćeri.

Mugoša je kazala da je najsretnija majka na svijetu.

“Ne znam gdje sam, ni na nebu ni na zemlji”, rekla je u kratkoj izjavi za Vijesti putem telefona.

Dodala je da od kćerke Jelene već ima jednu unuku, Mariju, koja će uskoro napuniti tri godine, javljaju vijesti.me